Contact Info
Email:contact@isurooneey.com
Maxaan Sameeyaa Ninkaygu Wakhti Ima Siiyo?
Su’aal:
Asc wr wbr, salaanta Islaamka ka dib walaalahayga Isurooneey, waxaan naftayda iyo tan idinkaba u dardaarmayaa cabsida Allaah. Waxaan kaloo idiinka mahad celinayaa sida fiican ee wafaqsan sharcigeena ee aad nagula talinaysaan.
Su’aashayda waa tan: ninkeyga waa shaqeeya habeen iyo maalin. Marka uu guriga yimaado, cunto ayaan u siiyaa, wuuna seexdaa. Aniga iyo isaga isma aragno.
Sariirta marka aan aado ayaan u imaadaa, mac ayaan siinaa, markaas ayuu xanaaqaa oo leeyahay, “Maxaa iga rabtaa? Respect isii, oo hurdo ayaa i heysa.”
Maxaan sameeyaa? Ninkeyga lama sheekeysan karo, lama joogi karo; waqti ima siiyo. Plzz jaaw.
Jawaab:
Walaal Amaal, ducada wanaagsan ee aad noogu duceysay, waxaan leenahay Aamiin. Allaha nagu maneysto cabsidiisa.
Intaas kadib, walaal, arrinta aad nasoo weydiisay waa mid maanta heysata gabdho badan. Nasiib darro, niman badan ayaa iska ilooba xaasaskooda iyo xaqa ay ku leeyihiin, oo inta ay siin lahaayeen kalgacal iyo xanaano ka fekera dhanka maadiga.
Walaal Amaal, waxaa muhiim ah inaad ninkaaga u sheegto waxa aad dareemeyso iyo waxa qalbigaaga ku jiro. Talaabooyinka aan kugula talinayno waa sidan:
Talooyin: Sida Ninkaaga Loogu Sheego Xaqaaga
- Si Wanaagsan Uga Hadal:
- Ninkayga qaaliga ahow, ma ogtahay waxa aan isku guursannay inay tahay inaan midba midka kale siiyo kalgacal, xanaano, iyo fiiro gaar ah?
- Xaqaaga Ku Xusuusi:
- Waxaa lagama maarmaan ah in mid kasta kan kale siiyo xaqa uu ku leeyahay, sida uu Allaah (swt) iyo Rasuulka (scw) noo faray.
- Qir Dareenkaaga:
- Ma ogtahay waxa aan guriga hooyaday uga soo tagay inaysan ahayn oo kaliya inaan cunto iyo cabbo, balse ay ahayd inaan noqdo xaaskaaga? Haddii cabid iyo cunid aan rabay, waxaan joogay guriga hooyaday.
- Wakhti Dalbo:
- Wakhtigaaga oo dhan waxaad siisay shaqada. Ee goorma ayaad aniga wakhti ii helaysaa?
- Faham Khaladaadka:
- Mase waxaad mooday in xaqa kali ah ee aan kugu leeyahay uu yahay inaad cabid iyo cunid oo keli ah i siisid?
- Qeex Baahidaada:
- Gacaliye, ma ogtahay inaan dareemayo cidlo, kalgacal iyo xanaano la’aan? Toban daqiiqo oo aad ila fadhiisato oo aad ii sheekayso waxay iga qaalisan tahay maalin dhan oo cuntadeed iyo cabiddeed ah.
- Dhibkaaga Muujiso:
- Ha u maleynin in dhunkashada aan ku dhunkanayo ay tahay ixtiraam darro. Laakiin, waxaan rabaa inaad dareento inaan ku jeclahay, rabana inaan kuu xaqiijiyo xaqaaga ninimo.
Gunaanad:
Marka ninkaaga la hadashay, ku dhiiri geli inaad labada dhinacba daryeel iyo jacayl wadaagnaan u abuurtaan. Ugu dambeyntiina, waxaan Ilaahay kaaga rajeynaynaa inuu adiga iyo ninkaaga idinku waafajiyo wixii dantiinna iyo diintiinna u wanaagsan. Aamiin.
FG:
Haddii su’aalo kale kugu soo baxaan ama aad rabto inaad si gaar ah ula xiriirto, markasta diyaar baan kuu nahay. E-mailkaaga iyo xogtaada midna lama gudbin doono. Waxa kaliya ee aan rabno waa inaan walaalahayaga caawino.
Allaha kuu sahlo dhammaan dhibaatooyinkaaga!
